तनहुँका युवा पिङ संरक्षणमा जुटे

दमौली, २८ असोजः तनहुँ जिल्लाका ग्रामीण क्षेत्रमा यो वर्ष दसैँको अवसरमा पिङ हाल्ने परम्परा पुनःजीवित हुँदै गएको छ। ग्रामीण भेगमा हराउँदै गएको पिङ संस्कृतिलाई जोगाउन युवा क्लबहरू सक्रिय रुपमा जुटेका छन्। दसैँका समयमा “भुइँ छाड्नुपर्छ” भन्ने प्रचलित मान्यताअनुसार विभिन्न ठाउँमा लिङ्गे र रोटे पिङ बनाएर युवाहरूले सांस्कृतिक धरोहरको संरक्षणमा योगदान पुर्याइरहेका छन्।

भानु नगरपालिका–१३ सम्जुरका युवाहरूले छ पिर्के रोटे पिङ बनाएका छन्। सम्जुरका युवा अर्जुन बानियाँका अनुसार, पछिल्लो पुस्ताको चासो घट्दै गएको र वैदेशिक रोजगारीको कारण गाउँका युवा पलायन हुन थालेपछि पिङ हाल्ने चलन हराउँदै गएको थियो। उहाँले भन्नुभयो, “पहिले दसैँ सुरु हुनुभन्दा अघि नै गाउँमा पिङ बनाउने चलन थियो, जसले दसैँको माहोललाई थप रमाइलो बनाउँथ्यो। अहिले भने गाउँमा युवा नै पाउन मुश्किल भएको छ, त्यसैले हामीले रोटे पिङ बनाएर यो परम्परालाई जोगाउन खोजेका छौं।”

यस्तै, व्यास नगरपालिका–१२ कमलाबारीमा अकला युवा क्लबले लिङ्गे पिङ बनाएको छ। क्लबका तारा पन्थका अनुसार, दसैँको सांस्कृतिक महत्त्वलाई सम्झेर पिङ बनाइएको हो। उहाँले भन्नुभयो, “पिङ हालेपछि मात्रै दसैँ आएको जस्तो अनुभव हुन्छ। पिङले वर्षको एकपटक जमिन छाड्ने अवसर दिन्छ भन्ने मान्यता हामीकहाँ रहँदै आएको छ।”

त्यस्तै, म्याग्दे गाउँपालिका–१ गुणादीमा फ्रेण्डसीप युवा क्लब, व्यास नगरपालिका–१० बैरेनी, शुक्लागण्डकी नगरपालिका–११ थामडाँडा, र व्यास नगरपालिका–३ दमौलीमा पनि रोटे र लिङ्गे पिङ हालेर दसैँको रौनक थपिएको छ।