इरानमा रहेका नेपालीले छिटो फर्किनू, जाने तयारी स्थगित गर्नुस् : परराष्ट्र मन्त्रालय

काठमाडौँ :
सरकारले इरानमा रहेका नेपालीलाई सकेसम्म चाँडो स्वदेश फर्किन र इरान जाने योजना स्थगित गर्न आग्रह गरेको छ ।

परराष्ट्र मन्त्रालयले आइतबार जारी गरेको ट्राभल एड्भाइजरी अनुसार, अमेरिका–इरान तनाव बढेपछि त्याहाँको अवस्था सामान्य नहुँदासम्म भ्रमण स्थगित गर्न सल्लाह दिइएको हो ।

इरानमा बसोबास वा रोजगारीमा रहेका नेपाली नागरिकलाई आफ्नो पासपोर्ट, परिचयपत्र लगायत आवश्यक कागजात सहजै उपलब्ध हुने ठाउँमा राख्न पनि मन्त्रालयले भनेको छ ।

थप जानकारी र समन्वयको लागि काठमाडौँस्थित परराष्ट्र मन्त्रालय र दोहास्थित नेपाली दूतावाससँग सम्पर्कमा रहन सुझाव दिइएको छ । हाल इरानमा रहेका नेपालीको ठ्याक्कै संख्या भने उपलब्ध छैन ।