अमेरिकी सेनाले हिजो राति इरानको मुख्य तेल निर्यात केन्द्र खार्ग टापुमा सैन्य आक्रमण गरेको दाबी गरेको छ । अमेरिकी केन्द्रीय सैन्य कमाण्डले आज सामाजिक सञ्जालमार्फत उक्त जानकारी दिएको हो ।
अमेरिकी सेनाले खार्ग टापुमा रहेका ९० भन्दा बढी इरानी सैन्य लक्ष्यहरूमा आक्रमण गरेको सैन्य कमाण्डले दाबी गरेको छ । आक्रमणमा तेलसम्बन्धी संरचनालाई भने नोक्सानी नपुर्याई सुरक्षित राखिएको जनाएको छ ।
उक्त आक्रमणबाट नौसैनिक बारुद भण्डारण स्थल, क्षेप्यास्त्र भण्डारण बंकर तथा अन्य धेरै सैन्य संरचनामा क्षति भएको जनाइएको छ । खार्ग टापु फारसको खाडीमा इरानको तटबाट झन्डै २५ किलोमिटर टाढा रहेको छ र यस टापुमार्फत करिब ९० प्रतिशत इरानको कच्चा तेल निर्यात हुने गर्दछ ।
अमेरिकी राष्ट्रपति डोनाल्ड ट्रम्पले सामाजिक सञ्जालमा लेख्दै उक्त आक्रमणले सैन्य लक्ष्यहरूलाई ‘पूर्ण रूपमा नष्ट गरेको’ जनाएका छन् । उनले यदि हर्मुज जलडमरू हुँदै हुने जहाज आवागमन अवरुद्ध भए खार्ग टापुको तेल संरचनालाई पनि निशाना बनाइने चेतावनी दिएका छन् ।
यसैबीच इरानका विदेशमन्त्री सैयद अब्बास अराघचीले इरानको तेल तथा ऊर्जा संरचनामाथि कुनै पनि आक्रमण भए त्यसको प्रतिशोधस्वरूप अमेरिकी कम्पनीसँग सम्बन्धित क्षेत्रीय संरचनाहरूमा प्रतिक्रिया दिइने चेतावनी दिनुभएको छ । रासस
Leave a Reply