दुधकोशी हाइड्रोपावरमा पाइप पड्किदा दुई इन्जिनियरको मृत्यु

सोलुखुम्बुमा निर्माण भई रहेको ८६ मेगावाट क्षमताको सोलुखोला दुधकोसी जलविधुत आयोजनामा पानी परीक्षण गर्ने क्रममा दुई जना इन्जिनियरको मृत्यु भएको छ।

आइतबार दिउँसो ३ बजेतिर फलामको पाइपमा पानी हालेर परीक्षण गर्ने क्रममा पाइप पड्किएर दुईजनाको ज्यान गएको प्रहरीले जनाएको छ। परिक्षणका क्रममा अर्का एकजना भने घाइते भएका छन्।

ज्यान गुमाउनेहरुमा हाइड्रोपावरमा इन्जिनियरका रुपमा काम गर्ने अछामका २६ वर्षीय सुवास राज रेग्मी र काभ्रेका २९ वर्षीय अर्जुन थापा रहेको जिल्ला प्रहरी कार्यालय सोलुखुम्बुले पुष्टि गरेको छ ।

उक्त घटनामा सिराहा औरही गाउँपालिका २ का २९ वर्षीय महमद जाबेतर राइन भने घाइते भएको कार्यालयले जानकारी दिएको छ। हेलिकोप्टरमार्फत काठमाडौं लगिएका घाइते राइनको ग्राण्डी अस्पतालमा उपचार भइरहेको छ ।

घटनाको विषयमा अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ।