काठमाडौं : पोखराबाट मुस्ताङको जोमसोम विमानस्थलका लागि उडेको तारा एयरको (9-N-AIT) कल साइनको ट्विनअटर विमान मुस्ताङको लेतेमा ठोक्किएको छ।
१३ नेपाली नागरिक, ४ जना भारतीय नागरिक, अन्य २ विदेशी नागरिक र सवार विमानको चालक दलका सदस्य सहित २२ जना रहेको विमान लेतेमा ठोक्किएको हो।
आइतबार बिहान ९ः५५ बजे उडेको उक्त जहाज सम्पर्कविहीन भएको र विमान मुस्ताङको लेतेमा ठोक्किएको जानकारी आएको पोखरा विमानस्थल स्रोतले जनाएको छ।
सम्पर्कविहीन रहेको जहाजको खोजीकार्य सुरु गरिएको तारा एयरका प्रवक्ता सुर्दशन बर्तौलाले जानकारी दिएका हुन्।
विमानमा क्याप्टेन प्रभाकर प्रसाद घिमिरे, को पाइलट इतासाप पोखरेल र एयर होस्टेज कास्मी थापा थिए। घटनाको विस्तृत जानकारीका लागि सुरक्षाकर्मी र स्थानीय सक्रियतापूर्वक लागिपरेको बताइएको छ।
काठमाडौं- नेपाल आयल निगमले आइतबार राति १२ बजेदेखि लागू हुने गरी पेट्रोलियम पदार्थको मूल्यवृद्धि गरेको छ ।
निगमले पेट्रोल, डिजेल, मट्टितेल र हवाई इन्धन (आन्तरिक) मा प्रतिलिटर १० र खाना पकाउने एलपी ग्यासमा प्रतिसिलिण्डर २०० रुपैयाँ वृद्धि गरेको हो ।
हाल पेट्रोलको मूल्य प्रतिलिटर १८०, डिजेल र मट्टितेलको मूल्य प्रतिलिटर १६३, हवाई इन्धनको मूल्य प्रतिलिटर १६६ तथा एलपी ग्यासको मूल्य प्रतिसिलिण्डर रु एक हजार ८०० पुगेको छ ।
निगमले यसअघि गत वैशाख ३१ गते पेट्रोल, डिजेल र मट्टितेलमा प्रतिलिटर रु १० वृद्धि गरेको थियो ।
काठमाडौं, बैशाख २८,२०७९ । शिक्षा‚ विज्ञान तथा प्रविधि मन्त्रालयले हिउँदे र वर्षे बिदा कटौती गरेको छ।
सरकारले सातामा दुई दिन सार्वजनिक बिदा दिने निर्णय गरे अनुसार कोर्स पूरा गराउन बिदा कटौती गरिएको मन्त्रालयका प्रवक्ता दिपक शर्माले जानकारी दिएका हुन् ।
निजी तथा आवासीय विद्यालय अर्गनाइजेशन (प्याब्सन)ले विद्यालयमा पनि यो निर्णय लागू गर्नुपर्ने भए कोर्स सक्ने विकल्प खोज्नुपर्ने सुझाव सरकारलाई दिएको थियो।
सातामा दुई दिन बिदा दिँदा समयमा कोर्स नसकिने भएपछि मन्त्रालयमा बिदाबारे छलफल चलेको थियो।
शैक्षिक क्यालेन्डरअनुसार वर्षभरि १ सय ८० दिन पठनपाठन सञ्चालन गर्नुपर्नेछ।
पेट्रोलियम पदार्थको आयात घटाएर विदेशी मुद्रा सञ्चिति बढाउन भन्दै गरिएको शनिबार र आइतबार दुई दिन शैक्षिक संस्थालाई समेत सार्वजनिक बिदा दिने निर्णय आगामी जेठ १ गतेदेखि लागू हुँदै छ।
काठमाण्डौ- गठबन्धनका तर्फबाट काठमाडौँ महानगरपालिकाको नगर प्रमुख उम्मेदवार सिर्जना सिंहले श्रमको सम्मान गर्ने वातावरण निर्माण गर्ने बताएकि छन् ।
नेपाल ट्रेड युनियन कांग्रेस काठमाडौँले आयोजना गरेको ‘स्थानीय तहको निर्वाचनमा ट्रेड युनियनको भूमिका’ विषयक अन्तरक्रिया कार्यक्रममा सिंहले आफू नगर प्रमुखमा निर्वाचित भएर श्रमको सम्मान गर्ने वातावरण निर्माण गर्ने बताएकि हुन् ।
“श्रमको सम्मान गरे मात्र देशको विकास हुन्छ, म नगर प्रमुखमा निर्वाचित भएमा श्रमको सम्मान गर्दै श्रमिकसँग सहकार्य गरेर अगाडि बढ्नेछु”, सिंहले भनिन् । उनले काठमाडौँ भित्रको फुटपाथको व्यवसायलाई व्यवस्थित गरेर अगाडि बढ्ने प्रतिबद्धता व्यक्त गरिन् ।
नगरप्रमुख उम्मेदवार सिंहले रात्रिकालीन समयमा महिलालाई सुरक्षित तवरले काठमाडौँभित्र हिँड्ने वातावरण निर्माणका लागि सबै वडाभित्र सीसी क्यामरा र पोलपोलमा बिजुलीबत्तीको व्यवस्था गर्ने स्पष्ट पारिन् ।
उनले श्रमिक महिलाका बालबालिकालाई राख्नका लागि शिशु स्याहार केन्द्रको व्यवस्था गर्नका साथै गृहिणी महिलाका लागि विशेष भत्ताको व्यवस्था गर्ने बताइन् ।
ट्रेड युनियन काँग्रेसका नेता एवम् पूर्व सांसद अच्युतराज पाण्डेले काठमाडौँको विकासका लागि यस पटक महिला उम्मेदवार सिंहलाई विजय गराउनुपर्ने बताए ।
ट्रेड युनियन काँग्रेसका महासचिव योगेन्द्र कुमार कुँवरले श्रमको सम्मान गर्न नसक्दा मुलुक पछाडि परेको भन्दै श्रमको सम्मान गर्ने पार्टी काँग्रेसको पक्षमा जनलहर सिर्जना गर्न सम्पूर्ण श्रमिकलाई आग्रह गरेका छन् ।
नेपाल ट्रेड युनियन काँग्रेसका सह कोषाध्यक्ष सुशीला घिमिरे, जी पी कोइराला लेवर फाउन्डेसनका महासचिब सुर्य नेपाल, नेपाल ट्रेड यूनियन कांग्रेस काठमाण्डौका पुर्व अध्यक्ष गणेश भट्टराई, नेपाल ट्रेड युनियन कांग्रेस काठमाडौँका अध्यक्ष देवीप्रसाद भुसाल लगायतले काठमाडौँ महानगरको प्रमुखमा महिलालाई टिकट दिएर काँग्रेसले महिलाप्रति सम्मान गरेको बताए । काठमाण्डौ महानगर लगायत सबै स्थानिय निकायहरु श्रम मैत्री हुनु पर्ने कुरामा जोड दिए ।
–चितवन चितवनमा बाघको आक्रमणबाट एक पुरुषको मृत्यु भएको छ । मृत्यु भएका पुरुष खैरहनी नगरपालिका–१३ का ६५ वर्षीय नारायण दाहाल रहेको जिल्ला प्रहरी कार्यालय चितवनले जनाएको छ ।
कार्यालयका सूचना अधिकारी नरहरि अधिकारीका अनुसार आज बिहान घर नजिकै रहेको कुमरोज मध्यवर्ती सामुदायिक वनको राप्ती घाँसे मैदानमा घाँस काट्न जाने क्रममा दाहाललाई बाघले आक्रमण गरेको थियो ।
दाहाललाई बिहान ८ बजे बाघले आक्रमण गरेको हो । आक्रमणमा परेका दाहालको घटनास्थलभन्दा एक किलोमिटर पर शव भेटिएको कार्यालयले जनाएको छ । शव बिहान १० बजे भेटिएको हो ।
