काठमाडौँ। प्रधानमन्त्री बालेन्द्र (बालेन) शाहको नेतृत्वमा नवगठित मन्त्रिमण्डलमा डा.विक्रम तिमिल्सिनाले सञ्चार तथा सूचना प्रविधि मन्त्रालयको महत्त्वपूर्ण जिम्मेवारी पाएका छन्। नुवाकोट क्षेत्र नम्बर १ बाट निर्वाचित डा. तिमिल्सिनाले अनुभवी र प्रभावशाली नेता डा. प्रकाशशरण महतलाई पराजित गर्दै संसदीय राजनीतिमा आफ्नो सशक्त उपस्थिति जनाएका हुन्।
राष्ट्रिय स्वतन्त्र पार्टीका तर्फबाट मन्त्री बनेका डा. तिमिल्सिनासँग सञ्चार क्षेत्रको झन्डै डेढ दशक लामो व्यावहारिक अनुभव रहेको छ। अष्ट्रेलियाको ग्रिफिथ विश्वविद्यालयबाट अन्तर्राष्ट्रिय सम्बन्ध र भू–राजनीतिमा विद्यावारिधि गरेका उनीसँग रेडियो सगरमाथा र विदेशका विभिन्न सञ्चार माध्यमहरूमा सम्पादकीय नेतृत्व सम्हालेको अनुभव छ।
राजनीतिमा प्रवेश गर्नुपूर्व त्रिभुवन विश्वविद्यालयमा अध्यापन गराउँदै आएका डा. तिमिल्सिना कूटनीति र सूचना प्रविधि दुवै क्षेत्रका विज्ञ मानिन्छन्। उनको यो विज्ञताले नेपालको सञ्चार र प्रविधि क्षेत्रमा नीतिगत सुधार र आधुनिकीकरणका लागि नयाँ दिशा प्रदान गर्ने अपेक्षा गरिएको छ।
