इनिशा विक प्रकरण: बलात्कार र हत्याको अभियोगमा चार किशोरविरुद्ध मुद्दा चलाउन सिफारिस

सुर्खेत । सुर्खेतकी १६ वर्षीया इनिशा विकको बलात्कार र हत्या घटनामा जिल्ला प्रहरी कार्यालयले अनुसन्धान प्रतिवेदन सरकारी वकिलको कार्यालयमा बुझाएको छ। प्रहरीले मुख्य अभियुक्तका रूपमा एक किशोरलाई ‘जबरजस्ती करणी’ र ‘कर्तव्य ज्यान’ मुद्दामा जन्मकैदको मागदाबी गरेको छ।

​प्रहरी उपरीक्षक (एसपी) सुधिरराज शाहीका अनुसार घटनामा संलग्न अन्य तीन जना किशोरलाई भने ‘ज्यान सम्बन्धी कसुर’ मा मुद्दा चलाउन सिफारिस गरिएको छ। उनीहरूले घाइते अवस्थाकी इनिशालाई समयमै अस्पताल पुर्‍याउन भूमिका नखेलेको प्रहरीको निष्कर्ष छ। पक्राउ परेका चारै जना १८ वर्षभन्दा कम उमेरका भएकाले उनीहरूको परिचय गोप्य राखिएको छ।

​गत फागुन २३ गते वीरेन्द्रनगर-१ स्थित सामुदायिक वनमा इनिशा मृत फेला परेकी थिइन्। पोस्टमार्टम रिपोर्टले बलात्कारपछि अत्यधिक रक्तश्रावका कारण उनको मृत्यु भएको देखाएको छ। यद्यपि, शरीरमा कुनै विषालु पदार्थ प्रयोग भए-नभएको खुल्ने ‘टक्सिकोलोजी’ र डीएनए रिपोर्ट आउन अझै बाँकी रहेको प्रहरीले जनाएको छ। ती नमुनाहरू परीक्षणका लागि विदेश पठाइएको छ।

​प्रहरीले प्रतिवेदन बुझाए पनि पीडित परिवारले अनुसन्धानमा चित्त बुझाएका छैनन्। जसका कारण १९ दिनदेखि इनिशाको शव कर्णाली प्रादेशिक अस्पतालमै रहेको छ। सरकारी वकिलको कार्यालयले प्रहरी प्रतिवेदनको अध्ययनपछि मात्र अदालतमा मुद्दा दर्ता गर्ने प्रक्रिया अघि बढाउने बताएको छ।