बर्खे र हिउँदे बिदा कटौती गरेर जेठबाट आइतबार विद्यालय बिदा

काठमाडौं, बैशाख २८,२०७९ । शिक्षा‚ विज्ञान तथा प्रविधि मन्त्रालयले हिउँदे र वर्षे बिदा कटौती गरेको छ।

सरकारले सातामा दुई दिन सार्वजनिक बिदा दिने निर्णय गरे अनुसार कोर्स पूरा गराउन बिदा कटौती गरिएको मन्त्रालयका प्रवक्ता दिपक शर्माले जानकारी दिएका हुन् ।

निजी तथा आवासीय विद्यालय अर्गनाइजेशन (प्याब्सन)ले विद्यालयमा पनि यो निर्णय लागू गर्नुपर्ने भए कोर्स सक्ने विकल्प खोज्नुपर्ने सुझाव सरकारलाई दिएको थियो।

सातामा दुई दिन बिदा दिँदा समयमा कोर्स नसकिने भएपछि मन्त्रालयमा बिदाबारे छलफल चलेको थियो।

शैक्षिक क्यालेन्डरअनुसार वर्षभरि १ सय ८० दिन पठनपाठन सञ्चालन गर्नुपर्नेछ।

पेट्रोलियम पदार्थको आयात घटाएर विदेशी मुद्रा सञ्चिति बढाउन भन्दै गरिएको शनिबार र आइतबार दुई दिन शैक्षिक संस्थालाई समेत सार्वजनिक बिदा दिने निर्णय आगामी जेठ १ गतेदेखि लागू हुँदै छ।