धनुषाको धनौजीमा तीन वडाबाट कांग्रेसको प्यानल विजयी, दुई नम्बर वडामा मतगणना स्थगित

जेठ ०२ , २०७९
जनकपुर ः धनुषाको धनौजी गाँउपालिकामा सम्पन्न भएको निर्वाचनमा तिनवटा वडामा नेपाली कांग्रेसको प्यानल नै विजय भएको छ ।

धनौजी गाँउपालिकाको ३,४ र ५ वडामा भएको मतगणना अनुसार वडा नं. ३ मा कांग्रेसका रामनारायण यादव ७०२ मत ल्याएर विजय भएका छन् भने निकटतम प्रतिद्धन्द्धी एमालेका रामदुलार मण्डल ५७९ , नेकपा एकिकृत समाजवादिका रामदेव मुखिया विन ३८० मत ल्याउन सफल भएका छन् । त्यस्तै दिनेश मुखिया विन ६६५, रोहित कुमार मुखिया ६३८, रेखा कुमारी पण्डित ६८१, मिना देवी ६८१ मत ल्याएर सदस्यतामा विजय प्राप्त गरेका हुन् ।

त्यस्तै वडा नं. ४ मा कांग्रेसका यावुक कवारीले ८२१ मत ल्याएका छन् भने निकटतम प्रतिद्धन्द्धी लोसपाका सन्तोष कुमार मण्डलले ३३३ र स्वतन्त्र उम्मेदवार तर्फ कलिम साफीले ३३० मत ल्याएका हुन् । सदस्यतातर्फ रामआशिष यादव ४२३, मोहन शाह ४०४, अमना खातुन ४१७ र मन्जु देवी ४०९ मत ल्याउन सफल भएका हुन् ।

वडा नं. ५ मा कांग्रेसका यावुक कवारीले ८२१ मत प्राप्त गर्नुका साथै निकटतम प्रतिद्धन्द्धी जसपा कमल नारायण पंकजले ५७६, नेकपा एमालेका हाकिम मोमिमाले ३५० मत पाएका हुन् । सदस्यमा विष्णुदेव मण्डल ८२२, रविन्द्र ७७८ प्रमिलादेवी ८०४, अनिता महरा ७९९ मत ल्याएर विजय भएका छन् ।

त्यस्तै वडा नं. २ को मतपेटीका गणना गर्न थालेपछि खसेको भन्दा १५ मत बढी फेला परेपछि विवाद भएको छ । बढि मत भेटिए पछि एकीकृत समाजवादीका कार्यकर्ता र प्रहरी बिच झडप भएको छ । तसर्थ घटना नियन्त्रणका लागी २५ राउण्ड हवाई फायर गरिएको छ ।