समानुपातिक सांसदलाई भोलि प्रमाणपत्र दिइने, निर्वाचन प्रक्रियाले पूर्णता पाउने

काठमाडौँ । निर्वाचन आयोगले समानुपातिक निर्वाचन प्रणालीबाट प्रतिनिधिसभामा निर्वाचित भएका उम्मेदवारहरूलाई भोलि चैत ५ गते आधिकारिक प्रमाणपत्र वितरण गर्ने भएको छ। आयोगका अनुसार भोलि बिहान ११:३० बजे कान्तिपथस्थित आयोगको कार्यालयमा एक विशेष कार्यक्रमबीच प्रमाणपत्र प्रदान गरिनेछ।

​प्रमाणपत्र ग्रहणका लागि निर्वाचित सदस्यहरूले आफ्नो नागरिकता वा राष्ट्रिय परिचयपत्र र दुई प्रति पासपोर्ट साइजको फोटो अनिवार्य बुझाउनुपर्नेछ। ११० जना समानुपातिक सांसदहरूले प्रमाणपत्र पाएसँगै यस वर्षको प्रतिनिधिसभा निर्वाचनको सम्पूर्ण प्रक्रिया औपचारिक रूपमा समाप्त हुने आयोगले जनाएको छ।

​गत फागुन २१ को निर्वाचनबाट ६ वटा दलले राष्ट्रिय दलको हैसियत बनाएका छन्। जसमा रास्वपाले ५७, कांग्रेसले २०, एमालेले १६, नेकपाले ९ तथा श्रम संस्कृति र राप्रपाले ४–४ सिट प्राप्त गरेका छन्।