काठमाडौँ । लिचीबारी घुस प्रकरणमा थुनामा रहेका पूर्वमन्त्री राजकुमार गुप्ताको निवेदनमाथि आज सर्वोच्च अदालतमा सुनुवाइ हुँदैछ। विशेष अदालतले पुर्पक्षका लागि थुनामा पठाउने आदेश दिएपछि सो निर्णय बदरको माग गर्दै गुप्ताले सर्वोच्चमा निवेदन दिएका हुन्।
न्यायाधीशद्वय हरिप्रसाद फुयाँल र श्रीकान्त पौडेलको संयुक्त इजलासमा उक्त निवेदनको पेसी तोकिएको छ। पोखराको मालपोत कार्यालयका प्रमुखको सरुवा रोक्का गर्ने र भूमि आयोगमा नियुक्ति मिलाइदिने बहानामा ५३ लाख रुपैयाँ घुस लिएको अभियोगमा उनीमाथि मुद्दा चलिरहेको छ।
यसअघि विशेष अदालतले प्राप्त प्रमाणका आधारमा गुप्तालाई निर्दोष मान्न नसकिने भन्दै जेल पठाउन आदेश दिएको थियो। गुप्ताले भने आफूमाथि लागेको आरोप झुटो भएको दाबी गर्दै आएका छन्।