Category: स्थानीय

काठमाडौँ विश्वविद्यालय, धुलिखेल नगरपालिका र रोटरी क्लब अफ धुलिखेलले अबको दुई वर्षभित्रमा वैकल्पिक ऊर्जा प्रयोग गरेर काठमाडौँदेखि धुलिखेलसम्म हाइड्रोजन बस सञ्चालनमा ल्याइने भएको छ ।

बुधबार वैकल्पिक इन्धनको स्रोतका रूपमा हाइड्रोजन ग्यास प्रयोग गर्ने गरी विश्वविद्यालय, नगरपालिका र रोटरी क्लबबीच त्रिपक्षीय सम्झौता भएको हो ।

समझदारी अनुसार धुलिखेल नगरपालिकाले हाइड्रोजन बस सञ्चालन गर्न आवश्यक नीति, नियम र आर्थिक सहयोग गर्ने, रोटरी क्लबले आर्थिक सहयोग जुटाउन लागि पर्ने र काठमाडौँ विश्वविद्यालयले प्रविधिको क्षेत्रमा काम गर्ने समझदारीपत्रमा उल्लेख गरिएको छ ।

लोकसेवा आयोगले कोरोना भाइरसका कारण स्थगित परीक्षाहरू फागुन ७ गतेदेखि सञ्चालन गर्ने भएको छ ।

आयोगले कोभिड–१९ महामारीको कारण स्थगित गरिएका उपसचिव वा सो सरह (अप्राविधिक/प्राविधिक), शाखा अधिकृत वा सो सरह (प्राविधिक) र स्वास्थ्य सेवातर्फ नवौँ, आठौँ र सातौँ तहको विभिन्न पदका लिखित परीक्षाहरू सञ्चालन गर्न लागेको जनाएको छ ।

न्याय, कानुन, सरकारी वकिल, प्रशासन, सामान्य प्रशासन, राजस्व, सङ्घीय संसद्, आर्थिक योजना तथा तथ्याङ्क, इञ्जीनियरिङ, सिभिल, जनरल, हाइवे, इरिगेशन, हाइड्रोपावर, हाइड्रोलोजी, मेटेरियोलोजी, सर्भे, वन, शिक्षा, माइनिङ, कृषि, पुस्तकालय विज्ञान, स्यानिटरीलगायत सेवाका परीक्षा हुने जनाइएको छ ।

आयोगले परीक्षाहरू सञ्चालनका लागि नयाँ तालिका समेत सार्वजनिक गरिसकेको छ ।

जाल्पा सामुदायिक लघुवित्त वित्तीय संस्थाले आगामी शुक्रबारदेखि आईपीओ निष्काशन गर्ने भएको छ । संस्थाले ५ करोड २२ लाख रुपैयाँ बराबरको ५ लाख २२ हजार कित्ता आईपीओ जारी गर्न लागेको हो ।
लघुवित्तले निष्काशन गर्न लागेको कुल ५ लाख २२ हजार कित्ता शेयरमध्ये ०।५ प्रतिशत अर्थात ८ हजार कित्ता कर्मचारीहरुलाई र सर्वसाधारणलाई छुट्याइएको शेयरमध्येको ५ प्रतिशत अर्थात २६ हजार १०० कित्ता सामूहिक लागनी कोषहरुलाई सुरक्षित गरेको छ ।
सर्वसाधारणले बाँकी ४ लाख ८७ हजार ९०० कित्ता शेयरका लागि आवेदन दिन सक्नेछन् । आईपीओमा २५ माघसम्म आवदन दिन पाइनेछ । आईपीओ निष्काशन तथा बिक्री प्रवन्धक प्रभु क्यापिटल लिमिटेड रहेको छ ।
बोर्ड नेतृत्व विहिन बन्दा ६ अर्ब ८० करोड ७६ लाख ४ सय रुपैयाँ बराबरका ६ करोड १३ लाख ५६ हजार ४ कित्ता आईपीओ निष्कासनका लागि २ दर्जन बढी कम्पनीहरु अनुमतिको पर्खाइमा रहेका थिए । यी दर्जन कम्पनीहरुले अब क्रमशः आईपीओ निष्काशनका लागि अनुमति पाउने बोर्डले बताएको छ ।

नेपाल सरकारले वैदेशिक रोजगारीबाट फर्केका युवालाई स्वरोजगारीमा प्रोत्साहन गर्ने उद्देश्यले पुरस्कृत गर्ने भएको छ ।

श्रम, रोजगार तथा सामाजिक सुरक्षा मन्त्रालयले बुधबार एक सूचना प्रकाशित गरी पुरस्कारका लागि वैदेशिक रोजगारबाट फर्केर उद्यम गरेका व्यक्तिसँग आवेदन आह्वान गरेको छ ।

वैदेशिक रोजगारीबाट फर्किएर स्वदेशमा उद्यम गरी राष्ट्रिय उत्पादन र रोजगारीमा योगदान गरिरहेका उद्यमीले आगामी फागुन १० गतेभित्र आवेदन दिई सक्नु पर्ने मन्त्रालयले जनाएको छ ।

कामदार भिसामा विदेश गएर कम्तिमा एक वर्ष काम गरी फर्किएको, वैदेशिक रोजगारीबाट फर्केर व्यवसाय सञ्चालन गरेको न्यूनतम एक वर्ष पूरा भएको र विगत पाँच वर्षभित्र श्रम मन्त्रालयबाट पुरस्कार प्राप्त नगरेका व्यक्तिले आवेदन गर्न सक्ने सूचनामा उल्लेख छ ।

पुरस्कार आवेदन फारम श्रम मन्त्रालयको वेभसाइटमा राखिएको छ। आवेदनका साथमा नेपाली नागकिताको प्रमाणपत्र, श्रम स्वीकृति, भिसासहितको राहदानी, आयकर दर्ता प्रमाणपत्र र गत आवको करचुक्ता प्रमाणपत्रको प्रतिलिपि तथा यसअघि पुरस्कार प्राप्त नगरेको स्वघोषणा पेश गर्नुपर्नेछ।

जिल्ला प्रशासन कार्यालय भक्तपुरले केही दिन अत्यावश्यक बाहेकका सेवा बन्द गर्नका लागि बिहीबारदेखि आलोपालो सेवा दिने भएको छ ।

कार्यालयले गत माघ ५ गतेबाट स्थगित गरिएका नागरिकता, राहदानी, राष्ट्रिय परिचयपत्र, सिफारिस लगायतका अत्यावश्यक नियमित सेवा अर्को सूचना जारी नभएसम्म माघ २० गतेदेखि आलोपालो सेवा दिने भएको हो ।

कोभिड– १९ को नयाँ भेरियन्ट सहितको ओमिक्रोन सङ्क्रमण बढ्दै गएपछि जिल्ला प्रशासन कार्यालय भक्तपुरले बन्द गरेका सेवा पनि यही २० गते बिहीबारदेखि आलोपालो प्रणालीबाट दिइने प्रमुख जिल्ला अधिकारी रुद्रादेवी शर्माले बताउनुभयो ।

आलोपालो प्रणाली अनुसार आइतबार, मङ्गलवार र बिहीबार भक्तपुर नगरपालिका र चाँगुनारायण नगरपालिका एवं सोमबार, बुधवार र शुक्रवार मध्यपुरथिमि नगरपालिका र सूर्य विनायक नगरपालिकाका सेवाग्राहीलाई सेवा दिइने उहाँले जानकारी दिनुभयो ।

पश्चिमी वायुको प्रभाव बिहिबार रातिबाट अझ बढ्ने भएको छ। जल तथा मौसम विज्ञान विभागका अनुसार हाल देशमा पश्चिमी वायुको आंशिक प्रभाव रहेकामा आज रातिदेखि यसको प्रभाव बढ्ने सम्भावना रहेको छ।

पश्चिम नेपालबाट प्रवेश गर्न लागेको उक्त मौसमी प्रणालीको प्रभावले आगामी तीन दिनसम्म मेघगर्जन सहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाले जनाएको छ ।

मौसम पूर्वानुमान महाशाखाको पछिल्लो विवरण अनुसार मंगलबार काठमाडौँ उपत्यकाको न्युनतम तापक्रम चार दशमलव चार डिग्री तथा अधिकतम तापक्रम १७ दशमलव तीन डिग्री सेल्सियस रहेको छ। त्यस्तै सबैभन्दा कम जुम्लाको न्युनतम तापक्रम माइनस पाँच दशमलव शून्य तथा सबैभन्दा धेरै जनकपुरको अधिकतम तापक्रम २२ दशमलव चार डिग्री सेल्सियस रहेको थियो।

यो मौसमी प्रणालीका कारण हवाई क्षेत्र, पर्वतारोहण, कृषि, यातायातलगायत दैनिक जनजीवनमा समेत असर पर्नसक्ने देखिएकाले चिसोबाट बच्न र हिमपातबाट हुनसक्ने प्रभावबाट आवश्यक सतर्कता अपनाउन महाशाखाले अनुरोध गरेको छ ।

काठमाडौं महानगरपालिका–७ मित्रपार्कको ओरालोमा रहेको माथिल्लो सडकको भित्तातिरको सडकमा गम्भीर घाइते अवस्थामा भेटिएका युवकको मृत्यु भएको छ ।

आइतबार राति ११ :३० बजेतिर घाइते अवस्थामा भेटिएका युवकलाई प्रहरीले तत्काल उद्धार गरी मैत्रीनगरस्थित नेपाल–भारतमैत्री अस्पतालमा पुर्‍याइएको थियो। अस्पताल लगेको केही बेरमानै उनको मृत्यु भएको हो ।

महानगरीय प्रहरी परिसर काठमाडौंका प्रवक्ता दिनेशराज मैनालीका अनुसार अन्दाजी २२ वर्षका मृतक युवकको परिचय अहिलेसम्म खुलेको छैन।

मित्रपार्क आसपासमा बस्ने युवकहरूको बीचमा गएराति झगडा भएको थियो । स्थानीयले प्रहरीलाई खबर गरेपछि उक्त युवकलाई घाइते अवस्थामा भेटाइएको हो ।
मृतक युवकको शव पोष्टमार्टमका लागि त्रिवि शिक्षण अस्पताल महाराजगञ्जमा राखिएको छ । झगडा गर्ने ३९ वर्षीय रुद्रबहादुर केसी र २८ वर्षका सुरेश दर्नाललाई प्रहरीले पक्राउ गरेको छ ।

सल्यान जिल्लामा बिभिन्न रोगहरुका कारण सुन्तला उत्पादन घट्दै गएको छ ।

सुन्तला उत्पादनबाट प्रशस्त आम्दानी प्राप्त गर्ने किसानहरुले केही बर्ष यता राम्रो आम्दानी लिन सकेको छैनन् ।

सुन्तलाको बोट नै सुक्न थालेपछि व्यासायिक रुपमा सुन्तला खेती गर्दै आएका किसानहरु चिन्तित भएका हुन् ।

सल्यान जिल्लामा करिब नौ सय किसानले व्यबसायिक रुपमा सुन्तला खेती गदै आएका छन् ।

हाल सुन्तलाको जरा कुहिने हाँगा सुक्ने जस्ता समस्याको कारण उत्पादन फस्टाउन सकेको छैन ।

काठमाडौं उपत्यकामा जारी स्मार्ट लकडाउनको समीक्षा गर्नका लागि उपत्यकाका तीन वटा जिल्लाका प्रमुख जिल्ला अधिकारीहरुको संयुक्त बैठक आज बस्ने भएको छ ।

कोरोना भाइरसको नयाँ भेरियन्ट ओमिक्रोन सङ्क्रमण रोकथाम तथा नियन्त्रणका लागि काठमाडौं उपत्यकामा जारी आदेश बारे समीक्षा गर्न उपत्यकाका तीन वटा जिल्ला प्रशासन कार्यालयको संयुक्त बैठक बस्न लागेको काठमाडौं जिल्लाका प्रजिअ गोविन्दप्रसाद रिजालले बताउनु भयो । बैठक अपरान्ह बस्ने उहाँले बताउनु भएको छ ।

हाल जारी सार्वजनिक यातायातमा जोर बिजोर प्रणाली प्रभावकारी नभएको र यसले सवारी साधनमा झन् भीडभाड बढेको र यसले जोखिमसमेत बढेको यातायात व्यवसायीको गुनासो भएकाले उक्त बैठक बस्न लागेको बताइएको छ ।